Fundazioa behin baino gehiagotan bildu zen udal-talde guztiekin, 2022rako proiektuak aurkezteko, eta, adostasun politikorik ez zegoenez, gobernu-taldeak erabaki du Irun 1522 Fundazioak eskainitako proiektu gehienak aurrera eramatea.
San Martzialgo Guduaren V. Mendeurrena Fundazioak harrituta hartu du Irungo Udalak joan den azaroaren 6an 1522ko guduaren oroitzapenaren inguruan aurrera eramango dituen ekintzak ezagutzera eman zituenean erakunde hau ez aipatzea.
Irungo Udalak, datorren urtean egingo dituen jardueren programan, bost ekitaldi iragarri ditu: Gazteluzar gazteluari balioa ematea, Irun, Hondarribia, Hendaia, Biriatou, Urrugne, Amaiur eta Noain udalerrien arteko topaketa eta senidetzea, musika-ziklo bat, Erakusketa Filateliko Nazionala (Exfilna) eta hiriko elkarte eta entitateek aurkeztutako proposamenetarako diru-laguntzak. Orain dela gutxi jakinarazi zenez, hau da Irungo Udalak San Martzialgo Guduaren V. mendeurrena ospatzeko egingo duena.
Harrigarria da Irungo Udalak aipamen txiki bat ere egin ez izana Fundazioari; izan ere, Udalak iragarri dituen bost ekimenetatik Irun 1522 Fundazioak hiru prestatu ditu, 20 kultur eta kirol elkarteren, partikularren, enpresen eta erakundeen laguntzarekin.
Fundazioak berak, Asociación Filatélica y Numismática del Bidasoa elkartearekin batera, lan egin du 2022an Exfilna Irunen egin dadin. Fundazioak berak egin du Gazteluzar gazteluaren ingurua egokitzeko aurreproiektua, REHABITE AHOLKULARITZA TEKNIKOA S.L.P.rekin eta TEUSA TÉNICAS DE RECUPERACIÓN, S.A.rekin batera, gero Udalak, lursail publikoaren titularrak, proiektua Sustapen Ministerioari aurkez zezan. Horrela, obra horien zenbateko osoaren %50 finantzatuko da.
Bi ekintza horiek eta inguruko udalerriekin senidetzea izan ziren Fundazioak talde politikoei eta gobernu taldeari azken bi urteetan egindako bileretan proposatu zizkienak. Izan ere, Irun 1522 Fundazioak Amaia KZn 2020ko otsailean egindako aurkezpen publikoan ezagutarazi zituen jarduerak dira.
Zoritxarrez, adostasun politikorik ezak eragin du Fundazioak ezin izatea zuzenean kudeatu proiektu horiek. Erantzunik gabe utziko ez dena da Fundazioak berak eta hiriko elkarte eta partikularrek proiektu horiek prestatzeko hilabete luzeetan egindako lana ez aitortzea.
Hala ere, erakundea zoriondu egin da bere proiektuak herritar guztiei zuzendutako Irungo Udalaren programa batean islatu direla ikusteagatik. San Martzialgo Lehen Guduaren 500. urteurrena ospatzea merezi du, eta, ildo horretatik, Fundazioak Irungo Udalari proiektuak aurkezten jarraitu nahi du gertaera historikoa ospatzeko.
‘Irun 1522: gudu bat baino gehiago’ dokumentalaren filmaketa
Bestalde, prentsaurrekoan, Iñaki Arruabarrena Irun 1522 Fundazioko lehendakariak eta Mario Simancas Ipso Facto Ekoizpen Artistiko Irundarreko zuzendariak azaldu dute datorren asteburuan ‘Irun 1522: gudu bat baino gehiago’ dokumentala grabatzen hasiko direla. Ipso Factorekin batera abian jarritako ikus-entzunezko proiektua da, eta Gipuzkoako Foru Aldundiaren laguntza finantzarioari esker gauzatu ahal izan da, baita hainbat enpresa eta partikularrek egindako ekarpenei esker ere.
Gudua garatu zen tokiak leialki birsortzeko, grabazioa Irungo Gazteluzar gazteluan eta Aldabe mendian zein Hondarribiko Karlos V.a paradorean, Jaizubiako paduretan eta Jasokundeko eta Sagarrondoko Andre Mariaren Parrokia-elizan egingo da, bai eta Bidasoa eskualdeko zenbait kaletan ere.
Horrela, asteburu honetan grabazioa Karlos V.aren paradorean eta Jasokundeko eta Sagarrondoko Ama Birjinaren parrokia-elizan egingo da.
Dokumentalean eskualdeko zenbait aktorek hartuko dute parte, besteak beste, Javier Tolosak eta Patxi Pérezek, baita beste hauek ere: Oihana Maritorena, Marijo Pontesta, José León Xarán, José Antonio Niño, José Mari Narzabal, Diego Espinoza eta Beñat Chavez.
Aire zabalean egin behar diren grabazioak udaberrira arte itxaron beharko dute, argia ez baita berdina urteko garai guztietan, eta, birsortu nahi diren gertaerak ekainean gertatu zirenez, egokia da itxarotea.
“Dokumental honen helburua da 1522ko batailaren inguruan gertatutakoa azaltzea. Datorren urtean bosgarren mendeurrena beteko da, eta proiektuak erakutsi nahi du nolakoak izan ziren gertaerak eta nola eragin zuen garai hartako herri eta merkataritzan, orain arte ez baitago gertakari horien berri ematen duen ikus-entzunezko materialik”, esan du Arruabarrenak.
Bestalde, Arruabarrenak nabarmendu du erakundea, dokumentalean ez ezik, Pandemia dela-eta bertan behera utzi behar izan zen hitzaldi-zikloari berriro ekiteko lanean ari dela. 2020ko martxoa baino lehen, hamar bat topaketa egin ziren jada ziklo horretatik.
Gainera, Fundazioaren helburua geldirik dauden beste proiektu batzuk berreskuratzea da, hala nola, ekitaldi gastronomikoak eta Basque Culinary Center-ekiko lankidetza.
